နဂါးငွေ့တန်းအဆင့် အမျိုးအစားများဆိုင်ရာ ဆွေးနွေးပွဲ

The United Galactic Federation ရဲ့ ကောင်စီခန်းမဟာ တိတ်ဆိတ်စွာ တောက်ပနေတယ်။ ဒီမှာ ဝေးလံတဲ့ ကြယ်စုတွေက ကိုယ်စားလှယ်တွေနဲ့ ပြည့်နေပါတယ်။ အပေါ်ယံကြည့်ရင်တော့ မတူကွဲပြားမှုရဲ့ ပြယုဂ်တခုပေါ့။ ဒါပေမယ့် မတူကွဲပြားမှုကို တကယ်တမ်း ဘယ်လိုနားလည်မလဲ။ ဒီအယူအဆကိုမကြာခဏ နားလည်မှုလွဲကြတယ်။ ညီညွတ်မှုနဲ့ ပတ်သက်ရင် အမြင်မတူတာက ပိုလို့တောင် ဆိုးသေးတယ်။ 

ဆွေးနွေးနေကြတာက အသိုင်းအဝိုင်းအဖွဲ့အစည်းတခုစီရဲ့ ဖွဲ့စည်းတည်ဆောက်ပုံတွေအကြောင်းပါ။

ကမ္ဘာမြေက သံအမတ်က စိုးရိမ်တဲ့ မျက်နှာနဲ့ ထရပ်လိုက်တယ်။

"Altitudo ဂြိုလ် က ချစ်ခင်ရတဲ့ မိတ်ဆွေများခင်ဗျ" လို့ သူက ပြောတယ်၊ "ကျွန်တော်တို့ သိလာရတာတော့ ခင်ဗျားတို့ရဲ့ ဂြိုလ်အသိုင်းအဝိုင်းက အရပ်ပုတဲ့သူတွေကို ချီးမြှောက်ပြီး အခွင့်အရေးတွေ ပေးထားချိန်မှာ အရပ်ရှည်တဲ့သူတွေကိုတော့ အလုပ်ကြမ်းနဲ့ အခွင့်အရေးကန့်သတ်မှုတွေထဲ တွန်းပို့ထားတာ တွေ့ရတယ်။ ဒါကို ခင်ဗျားတို့က သဘာဝကျတယ်လို့ ပြောတယ်။ ဒါပေမဲ့ ကျွန်တော်တို့ စိုးရိမ်တာက ခင်ဗျားတို့ အန္တရာယ်ရှိတဲ့ အမှားတခုကို လုပ်နေတာပဲ။ ခင်ဗျားတို့က လူတယောက်ရဲ့ တန်ဖိုးကို အရပ်အမောင်းလို ရိုးရှင်းတဲ့အရာတခုနဲ့ တိုင်းတာနေတယ်။ အဲဒါက ကျွန်တော်တို့ ကမ္ဘာမြေ မှာ တိုက်ခိုက်နေရတဲ့ 'ခွဲခြားဆက်ဆံမှု' ဆိုတဲ့ အရာပဲ"

Altitudo က အရပ်ပုပုနဲ့ ကိုယ်စားလှယ်၊ သံအမတ် Lyra က ပြန်ပြောဖို့ ထရပ်လိုက်တယ်။ သူမရဲ့ အသံက တည်ငြိမ်တယ်။ ယုံကြည်မှုအပြည့် ရှိတယ်။

"ခင်ဗျားတို့ ငါတို့ကို နားလည်မှုလွဲနေတယ်" လို့ သူမက ပြောတယ်။ "ငါတို့ရဲ့ ဂြိုဟ်ပေါ်မှာ ဆွဲငင်အားက အရပ်ပုတဲ့ သတ္တဝါတွေကို မတူညီတဲ့နည်းနဲ့ သက်ရောက်တယ်။ သူတို့က ပိုပြီး လွယ်လွယ်ကူကူ လှုပ်ရှားနိုင်တယ်၊ စွမ်းအင်ကို ပိုပြီး ချွေတာနိုင်တယ်။ ပြီးတော့ ငါတို့ရဲ့ ပတ်ဝန်းကျင်နဲ့ လိုက်လျောညီထွေဖြစ်တဲ့ပုံကို စဉ်းစားပါဦး။ အရပ်ရှည်တဲ့သူတွေက သဘာဝအားဖြင့် ပိုသန်မာပြီး လက်တွေ့ကျတဲ့ အလုပ်တွေနဲ့ ပိုပြီး သင့်တော်တယ်။ ဒါ့အပြင် အရေးကြီးတာက အရပ်အမောင်းဆိုတာ ရှင်းရှင်းလင်းလင်း တိုင်းတာနိုင်တယ်လေ။ ဒါဟာ ခွဲခြားဆက်ဆံမှု မဟုတ်ဘူး။ ဒါဟာ သဘာဝက သူ့အလုပ်သူ လုပ်နေတာပဲ။ ငါတို့က သက်သာထိရောက်မှုရှိတဲ့အရာ၊ သဘာဝဥပဒေသကိုပဲ လိုက်နာတာပါ။"

ကမ္ဘာမြေကိုယ်စားလှယ်က ပြန်ပြောဖို့ ပြင်နေတုန်းမှာပဲ ပုံရိပ်အသစ်တခု တောက်ပလာတယ်။ Galaxy Bello က သံအမတ် Zephyr ပါပဲ။ ကျား-မ အယူအဆမရှိတဲ့ Galaxy Bello က ကိုယ်စားလှယ်ကြီး Zephyr ရဲ့ ပုံသဏ္ဌာန်က ဟိုလိုဂရမ်အလင်းရောင်နဲ့အတူ ညင်ညင်သာသာ ပြောင်းလဲနေတယ်။

"လေးစားစွာနဲ့" လို့ စပြောတယ်၊ "ခင်ဗျားတို့ရဲ့ ဆွေးနွေးမှုက စိတ်ဝင်စားဖို့ကောင်းတယ်။ ထောက်ပြစရာလည်းရှိတယ်။ ကမ္ဘာမြေမှာ ခင်ဗျားတို့က လူတွေကို ရုပ်ပိုင်းဆိုင်ရာ လက္ခဏာတွေနဲ့ မခွဲခြားဘူးလား။ ခင်ဗျားတို့က အဲဒါကို ကျား/မလို့ ခေါ်တယ်။ တချို့ကို သဘာဝခေါင်းဆောင်တွေလို့ မြင်ကြပြီး တချို့ကို မိခင်တွေ၊ စောင့်ရှောက်သူတွေလို့ မြင်ကြတယ်။ တချို့ကို သန်မာသင့်တယ်လို့ ပြောကြပြီး တချို့ကို နူးညံ့သင့်တယ်လို့ ပြောကြတယ်။ အဲဒါက Altitudo က အရပ်အမောင်းနဲ့ သုံးတဲ့ ယုတ္တိအယူအဆနဲ့ မတူဘူးလား။ ခင်ဗျားတို့က အဲဒါကို ယဉ်ကျေးမှုလို့ ခေါ်တယ်။ ဒါပေမဲ့ အဲဒါက ဘက်လိုက်မှုနောက်တမျိုး မဟုတ်လား။"

အခန်းက တိတ်ဆိတ်သွားတယ်။ ကမ္ဘာမြေသံအမတ်က အနေရခက်သွားပြီး ကိုယ်ပါလှုပ်ရှားသွားတယ်။

"ဒါပေမဲ့ ကျားမက ဇီဝဗေဒအပေါ် အခြေခံထားတာလေ" လို့ သူက ပြောတယ်။

Zephyr က သူရဲ့ ခေါင်းကို စောင်းလိုက်တယ်။

"ဟုတ်တယ်၊ ဇီဝဗေဒက တို့ကို မတူညီတဲ့ ခန္ဓာကိုယ်တွေ ပေးတယ်။ ဒါပေမဲ့ အဲဒါက တို့ကို မွေးရာပါ ကံကြမ္မာတွေ မသတ်မှတ်ပေးဘူး။ ခင်ဗျားတို့ ကျားမနဲ့ ဆက်စပ်ထားတဲ့ စိတ်ခံစားချက်တွေ၊ အလုပ်အကိုင်တွေ၊ အပြုအမူတွေက တို့ရဲ့ ဆဲလ်တွေထဲမှာ ရေးထားတာ မဟုတ်ဘူး။ အဲဒါတွေက ခင်ဗျားတို့ ပြောတတ်အောင် သင်ယူထားတဲ့ ပုံပြင်တွေပဲ။ Altitudo လိုပဲ ခင်ဗျားတို့လည်း ဇီဝဗေဒအချက်အလက်ဆိုတာနဲ့ ကောက်ယူရတဲ့အဓိပ္ပာယ်ဆိုတာကို ရောထွေးနေတယ်။ ခင်ဗျားတို့က လက္ခဏာတွေကို မြင်ပြီး အဲဒီအပေါ်မှာ ဘောင်တွေခတ်တယ်။"

အခန်းက အဲဒီအဆိုပြုချက်ကို အပြည့်အဝ မကြေညက်ခင်၊ နားမလည်သေးမှာပဲ အသံအသစ်တခု ပေါင်းဝင်လာတယ်။ Galaxy Centro က Sigma လို့ ခေါ်တဲ့ ပုဂ္ဂိုလ်တဦး။ သူတို့က ပုံသဏ္ဌာန်တခုတည်းလည်း မဟုတ် အသံတခုတည်းလည်း မဟုတ်ဘဲ ပြောင်းလဲနေတဲ့ပုံရိပ်တွေနဲ့ သတ္တဝါတမျိုးဖြစ်တယ်။

"ဖြစ်နိုင်တာကိုပြောရရင် အခုပြဿနာက ဆွေးနွေးနေတာထက်တောင် ပိုနက်ရှိုင်းနေသေးတယ်" လို့ Sigma က ပြောတယ်။ "ဖြစ်နိုင်တာက တကယ့်ပြဿနာက တို့ရဲ့ အတူနေတသားတည်းဖြစ်နေတဲ့အုပ်စုထဲကလူတွေ အတွက်တောင်မှ အမျိုးအစားတွေကို သုံးနေတာကိုက ပြဿနာပဲ။"

အခန်းက လှုပ်ရှားသွားတယ်။

"ခင်ဗျားတို့က အရပ်အမောင်းအကြောင်း ပြောတယ်။ ကျားမအကြောင်း ပြောတယ်။ ဂလက်ဆီတွေအကြောင်းတောင် ပြောသေးတယ်၊ ဒါတွေက ခိုင်မာတဲ့အရာတွေလိုမျိုးပေါ့။ ဒါပေမဲ့ အရာအားလုံး စီးဆင်းနေတယ်။ အရာအားလုံး ချိတ်ဆက်နေတယ်။ ခင်ဗျားတို့က လူတွေကို အခန်းကဏ္ဍတွေထဲမှာ သတ်မှတ်ထားတယ်၊ အကျဉ်းထောင်တွေလို ပုံရိပ်တွေ တည်ဆောက်တယ်၊ ပြီးတော့ ပိုနက်ရှိုင်းတဲ့ အမှန်တရားကို မေ့သွားတယ်ထင်တယ်။ ဘယ်သတ္တဝါမှ သူ့ဘာသာ အပြည့်အဝရပ်တည်တာ မဟုတ်ဘူး။ ထာဝရ မဟုတ်ဘူး။"

ပြီးတော့ တခြားအသံတခု ထွက်လာတယ်။ ပိုညင်သာပေမဲ့ ပိုလေးနက်တယ်။ အသိတရားအခြေခံမဟာမိတ်အဖွဲ့ (Pan-Sentience Coalition) က သံအမတ် Xylar ။ သူတို့ရဲ့ အသားအရေက ကြယ်ဝါတခုလိုပါပဲ၊ တောက်ပနေတယ်။

"ခင်ဗျားတို့ အားလုံး တွေးဆပြီး ပြောခဲ့ကြတာပါ။ ဒါပေမဲ့ ထည့်စဉ်းစားရမယ့် နောက်ထပ် မျက်ကွယ်ပြုမှုတခု ရှိသေးတယ်။ အကြီးဆုံး အမျိုးအစားကတော့ မျိုးစိတ်ပဲ။"
အခန်းက ငြိမ်ပြီး ကြောင်သွားတယ်။

"ခင်ဗျားတို့က လူတယောက် ဘယ်လောက် အရပ်ရှည်လဲ၊ ကျားမ ဘာတွေလဲဆိုတာကို ငြင်းခုန်ကြတယ်။ ဒါပေမဲ့ ခင်ဗျားတို့ အားလုံးက ခွဲခြားနေတာ ရှိသေးတယ်။ ဥပမာ ကမ္ဘာမြေ က 'လူသား' နဲ့ 'တိရစ္ဆာန်' လိုမျိုး၊ ပြီးတော့ 'ခင်ဗျားတို့ အမျိုး' နဲ့ 'သူတို့ အမျိုး' လိုမျိုး မျိုးစိတ်တွေကို ခွဲခြားနေတုန်းပဲ။ ခင်ဗျားတို့က တရားမျှတမှုအကြောင်း ပြောတယ်၊ ဒါပေမဲ့ ခင်ဗျားတို့ရဲ့ ကိုယ့်သမိုင်းကို မေ့နေတယ်။ ဥပမာ ကမ္ဘာမြေမှာ ခင်ဗျားတို့က ထရီလျံပေါင်းများစွာသော တိရစ္ဆာန်တွေကို ချုပ်နှောင်ပြီး နှစ်စဉ်သတ်ဖြတ်တယ်။ သူတို့ နာကျင်မှုကို မခံစားရလို့ မဟုတ်ဘူး၊ သူတို့ ခံစားရတာ ရှင်းနေတယ်၊ ဒါပေမဲ့ သူတို့က 'ခင်ဗျားတို့ မျိုးစိတ်' မဟုတ်လို့ပဲ။ ခင်ဗျားတို့က အဲဒါကို သဘာဝကျတယ်လို့ ခေါ်တယ်။ ခင်ဗျားတို့က အဲဒါကို အစားအစာလို့ ခေါ်တယ်။ ဒါပေမဲ့ အဲဒါက အမှန်တရားအတွက် မဟုတ်ဘဲ အဆင်ပြေဖို့ ဆွဲထားတဲ့ မျဉ်းကြောင်းတခုပဲ။"

ကမ္ဘာမြေသံအမတ်က အံ့အားသင့်သွားပုံရတယ်။

"ဒါပေမဲ့ တိရစ္ဆာန်တွေက ကျွန်တော်တို့နဲ့ မတူဘူးလေ—"

"ခင်ဗျားတို့ သေချာရဲ့လား" လို့ Xylar က ညင်ညင်သာသာ မေးတယ်။ "သူတို့ မခံစားရဘူးလား။ သူတို့ မပေါင်းသင်းတတ်ဘူးလား၊ ဝမ်းမနည်းဘူးလား၊ မကစားဘူးလား၊ မခံစားရဘူးလား။ ဘယ်သူ အသက်ရှင်ခွင့်ရလဲဆိုတာကို ဉာဏ်ရည်က ဆုံးဖြတ်တာလား။ ဘာလို့ အတောင်ပံနဲ့ အစွယ်နဲ့ အမွေးအမျှင်နဲ့ ခွန်အားနဲ့ မဆုံးဖြတ်သလဲ။ ခင်ဗျားတို့ အဲဒီစည်းမျဉ်းကို ခင်ဗျားတို့ရဲ့ ကိုယ်ပိုင်မျိုးစိတ်တွေအပေါ်မှာ သက်ရောက်မှာလား။ စာမေးပွဲမှာ အမှတ်နည်းတဲ့ ကလေးတယောက်ကို၊ ဥာဏ်နည်းသူတွေကို ခင်ဗျားတို့ စားမှာလား။ တိရစ္ဆာန်တွေက သူတို့ရဲ့ ရှင်သန်ရပ်တည်ရေးအတွက် တကောင်နဲ့တကောင် စားကြတယ်လို့ ခင်ဗျားတို့ ထင်ရင် ခင်ဗျားတို့မှာ အဲဒီလို နာကျင်အောင် လုပ်မစားဖို့ လုံလောက်တဲ့ နည်းပညာတွေနဲ့ ဉာဏ်ရည်တွေ ရှိတယ်။ ဘာလို့ မလုပ်ကြတာလဲ။"

အခန်းက တိတ်ဆိတ်သွားတယ်။

"ခင်ဗျားတို့က ကျပန်း အမျိုးအစားတွေကို သတ်မှတ်တဲ့အတွက် တခြားသူတွေကို ဝေဖန်တယ်" လို့ Xylar က ဆက်ပြောတယ်၊ "ဒါပေမဲ့ အကြီးဆုံး နံရံကြီး ဖြစ်တဲ့ 'ငါတို့' နဲ့ 'သူတို့' ဆိုတဲ့ မျိုးစိတ်တွေ ကြားက နံရံကြီးကတော့ မပြိုလဲသေးဘူး။ ဖြစ်နိုင်တာက တကယ့် တိုးတက်မှုဆိုတာ အုပ်စုတွေကြားက သေးငယ်တဲ့ ခြံစည်းရိုးတွေကို ဖျက်ဆီးရုံတင် မကဘူး၊ သတ္တဝါတွေကြားက ကြီးမားတဲ့ အတားအဆီးတွေကိုပါ ဖျက်ဆီးတာကို ဆိုလိုတာများ ဖြစ်နိုင်တယ်မဟုတ်လား"

ခဏတာ အခန်းက အသက်ရှူမှားသွားကြတယ်။ ဖြစ်နိုင်တာက အကြီးမားဆုံး ဉာဏ်ပညာတိုးတက်မှုက ဂလက်ဆီတွေကြား ခရီးသွားလာတာ မဟုတ်ဘူးထင်တယ်။ တကယ့်ပညာက မိမိတို့ရဲ့ လောကအညွှန်းအောက်မှာ မြင်တတ်အောင် သင်ယူတာများလား။ အရပ်အမောင်းအပြင်၊ ကျားမအပြင်၊ မျိုးစိတ်အပြင်၊ ဘာတွေရှိသလဲ။

ကမ္ဘာကြီးကို သတ်မှတ်ထားတဲ့ အခန်းကဏ္ဍတွေနဲ့ နာမည်တွေရဲ့ မြေပုံတခုလို မဟုတ်ဘဲ၊ စီးဆင်းနေတဲ့၊ ပျက်စီးလွယ်တဲ့ အသက်ဇာတ်ကြိုးတခုလို မြင်နိုင်ပါ့မလား၊ အဲဒီမှာ ကြိုးတမျှင်စီက အရေးပါနေတာမျိုးဖြစ်လာနိုင်သလားပေါ့။